Mga kapitan di loyal sa BOPK itaktak ok ni Mike

Suportado ni Bise Mayor Michael Rama ang desisyon ni Mayor Tomas Osmeña nga taktakon pagka sakop sa Bando Osmeña Pundok Kauswagan (BOPK) kadtong mga kapitan sa barangay nga dili mosuporta ni Kongresista Antonio Cuenco sa South district.

Gipasabot ni Rama nga sukad pa sa sinugdanan dihang mikandidato siya pagka konsehal sa BOPK niadtong tuig 1992 kanunay gyud nga magkahiusa ang partido ingon man ang mga lider niini.

Gipasabot sa bise mayor nga gikinahanglan sa usa ka lider sa BOPK nga mokampanya og mosuporta gyud kini sa tanang mga kandidato sa partido gikan sa pagka-mayor, bise mayor, pagka-konsehal ug ngadto na sa pagka kongresista.

Gipasabot ni Rama nga dili maayo sa magpailang lider o sakop sa BOPK apan pilion lang ang mga kandidato sa partido nga suportahan.

Matud ni Rama nga mahulog nga sagpa sa ilang nawong kun dunay mga lider nila sa BOPK nga makit-ang mokuyog og kampanya sa kontra sa politika.

Giklaro hinuon sa bise mayor nga walay balaod nga nagdili niadtong mga lider o opisyal sa barangay nga padayong moangkon nga sakop sa BOPK apan gipasabot usab niya kini nga dunay kaugalingong balaod ang partido nga gikinahanglang sundon ug respetuhan.

Nabalaka si Rama nga makahatag og dakong kasamok sa ilang partido kun dunay uban nilang mga lider ang pasagdan nga mokampanya sa ubang kontra nila sa politika sama pananglit kang kanhi Cebu City Sports Commissioner Jonathan Guardo nga maoy kandidato sa Genuine Opposition pagka kongresista sa south district atbang ni Cuenco.