Ilegal nga panagatan nasakmit sa Santander

Usa ka ilegal nga panagatan gidakop sa hiniusang puwersa sa 701 Maritime Police sa Santander ug Bantay Dagat Commission human kini migamit og pukot nga gagmay og mata sa miaging tungang gabii sa kadagatan sa Pasil, Santander.

Nangulo sa maong operasyuon si PO1 Gerardo Tumbiga Jr., PO1 Edward Llavan ug laing upat ka sakop sa Bantay Dagat nga sila si Tranquilino Boreros, Pedro Caet Jr., Marcial Ramires ug Roy Gumilac.

Ang maong grupo misakmit sa FB San Pedro nga gipanag-iya ni Alex Zamora nga taga Danao City ug dunay 20 ka mga tripulante niini.

Si SPO3 Edgardo Cavite nga nahinabi sa Banat News miila sa mga nadakpan nga ang kapitan nga si Celso Ypil, chief engineer Domingo Ligante, Tomad de Leon, Ranulfo Avila, Roel Jinia, Jemar Albios, Oliver Luchaves, Fermin Luchaves, Rodolio Cascavil, Wendill Morillo, Richard Vallejo, Ronald Sillagay, Moese Albaro, Andreo Albios, Arnel Barral, Armando Barral, Hendrio Albios, Juvanio Albios, Agustin Capoy, Agustin Gonzaga, Hedilito Cano ug Regan Villacarda ang tanan pulos mga residente sa Looc, Danao City.

Nakuha gikan kanila ang 12 ka banyera nga puno sa isdang budburon.

Matud ni SPO3 Cavite sila nanagat sa 1.85 kilometer sa kadagatan duol sa maong barangay ilabi na nga migamit kini og gagmay og mata nga pukot hinungdan nga sila gipangdakop sa mga sakop sa Maritime ug Bantay Dagat Commission.

Ang 20 ka mga dinakpan kasamtangan gitanggong sulod sa Santander Police Station.

Kagahapon sa gihimong follow-up sa Banat News niduaw ang tag-iya sa panagatan nga si Zamora.