Si Corro nga nagtinguha karon sa pagpapili pagka mayor sa lungsod sa Daan Bantayan mibutyag nga klaro kaayo nga nagpagamit ang mga kapitan sa barangay sa pagpanghasi ni Mayor Loot kanila.
Gitumbok ni Corro ang nahitabo didto sa Sitio Cortehan sa barangay Tapilon sa maong lungsod niadtong Sabado sa hapon.
Matud pa ni Corro nga nagpahigayon sila og usa ka "pulong-pulong" didto sa luyong bahin sa pinuy-anan ni retirado nga Koronel Hiram Binatiro sa maong lugar dihang miabot si Kapitan Corsino "Nicknick" Rosas nga nakainom.
Si Rosas nga misulod pagkalit sa luyong bahin sa balay ni Binatiro gusto unta nga undangon ang maong pulong-pulong. Apan wala gayud kini nahimo hinungdan nga kini milakaw.
Apan mibalik kini nga namulong nga puyde ipadayon ang maong pulong-pulong basta dili mugamit og karaoke.
Gumikan kay wala siyay nahimo, gusto unta niya nga kuhaon ang mikropono kay musulti usa siya. Wala gayud siyay nahimo, nainit naman ang uban hinungdan nga naglugos paggawas ang kapitan.
Nadunggan ang kapitan nga mitawag sa iyang cellular phone ug nagpahibawo sa kasulti niini nga usa ka babaye nga dili gayud muhunong ang pulong-pulong.
Pipila ka gutlo matud pa ni Corro miabot ang sakyanan sa kapolisan sa lungsod. Apan wala silay nahimo gumikan kay diha man sulod sa balay ang maong kalihukan.
Gipasabot ni Corro nga adunay mga higayun nga ang kapitan sa silingan nga barangay Tinubdan ug Lanao gusto mupahunong sa ilang pulong-pulong.
Wala hinoon nahimo si Kapitan Juanito Ybanez sa barangay Tinubdan ingon man si Kapitan Eufemio delos Santos sa Linao.
Apan gitataw ni Corro nga dili gayud kini nila mahimo gumikan kay ila man kini nga katungod ug wala usab sila mangita og samok.
Gawas pa pribado ang lugar nga ilang gihimoan sa kalihukan.
Nanawagan si Corro sa mga kapitan sa barangay nga dili magpagamit gumikan kay dili gayud sila magpanuko pagpasaka og kaso batok niadtong muhasi kanila.
Gitataw usab ni Corro nga ang ilang grupo mahigugmaon sa kalinaw ug dili gusto og kasamok.