Fil-Invest interesadong mopalit sa SRP

Niabot na dinhi sa dakbayan sa Sugbu ang representante sa Fil-Invest aron mohimo og negosasyon sa mga opisyal sa dakbayan alang sa ilang tinguha nga mopalit og luna diha sa South Reclamation Project (SRP).

Ang representante sa Fil-Invest pormal nga nakigdungan og pamahaw kang Mayor Tomas Osmeña kagahapon sa buntag aron sugdan ang negosasyon sa tinguha nga pagpalit nila og luna diha sa SRP.

Giangkon ni Osmeña nga interesado ang maong kompaniya nga makakuha og luna sa SRP nga ilang buboan og puhonan dinhi sa Sugbu human niini masuta ang maong lugar nga haom alang sa pamatigayon.

Wala hinoon itug-an sa mayor ang punto nga ilang nahisgutan atol sa ilang negosasyon tungod kay nagdumili pa ang representante sa maong kompaniya pagpublikar sa mga inisyal nilang nasabutan hangtud nga kini ma-finalize.

Ang Fil-Invest nipadayag usab sa ilang interes pagbubo og puhonan sa SRP human napublikar ang offer sa SM Prime Holdings Incorporated nga joint venture tali sa kagamhanan sa siyudad aron mao na kiniy modumala sa SRP.

Si Osmeña wala pay konkretong desisyon sa maong offer tungod kay gitin-aw niini karon nga gawas sa dugang salapi nga mahakot sa siyudad kon mahalin ang SRP gusto sab niya nga sigurado kining makahatag og dugang oportunidad sa pagpanarbaho sa mga Sugbuanon.

Dili usab buot ang mayor nga talikdan ang unang kliyente sa siyudad ang Bigfoot Company nga nagkasinabot nang mo-abang og duha ka hektaryas nga luna ug mopalit pa og laing 16 hektaryas nga maoy ilang tukoran og movie studio ug international yatch club nga makig-kompetensiya sa tibuok kalibutan.