Batan-on gipusil, kaubang babaye gipangtulis sa mga lalaki

Gipusil ang usa ka batan-ong lalaki ug gitulis sa tulo ka wala mailhing lalaki ang kuyog sa biktimang duha ka higalang babaye gikan nitambong og disko sa miaging kaadlawon sa Upper Natimao-an Carmen.

Apan ang kapolisan mitutok sa posibling motibo mao ang panagribal sa fraternity.

Segun sa report nga midangat sa Provincial Police ang biktima giila nga si Rey Villarube, 18, ulitawo ug residente sa Sitio Pagutlan, Basak sa sama nga lungsod.

Ang biktima uban sa laing duha ka batan-ong babaye nga sila si Maricel Laping ug Vivian Bejoc nanglakaw paingon mamauli gikan nitambong og disko sa naasoy'ng lugar.

Apan pag-abot sa dapit nga nahitaboan dihay tulo ka wala mailhing lalaki ang nibabag sa ilang agianan.

Ang biktima nga nakakita mikaratil og dagan pahilayo apan ang usa sa tulo ka lalaki migukod ug gipusil ang biktima diin naigo sa iyang buko-buko ug niungot ang bala diha sa dughan gamit ang wala matinong kalibre sa armas.

Human sa hitabo sila si Laping ug Bejoc gipanguhaan sa ilang kuwarta diha sa ilang bulsa sa laing duha ka lalaki.

Nakuha gikan kang Laping ang P14.00 ug P10.00 ang kang Bejoc samtang ang biktima nga si Villarubi daling gihatod sa Vicente Sotto Memorial Medical Center sa dakbayan sa Sugbu.

Ang tulo ka wala mailhing lalaki dali usab nga nakasibat palayo sa nahitaboan.

Si Insp. Carlos Reyes nga nahinabi sa Banat News niingon base sa iyang pakisusi sa nahitaboan ang tulo ka gikatahapan dunay laing walo nga kauban apan wala pa nila mailhi.

Matud niya ang tulo ka gikatahapan namay-ongan ni Laping ug Bejoc dihang ila kining gikapares og panayaw sulod sa diskohan.

Dugang pang Insp. Reyes ang duha ka babaye nitug-an kaniya kung ilang makit-an pag-usab ang tulo ila kining mailhan ug matudlo nga sila maoy responsable sa kremin.