Managsuon nagtinigbasay

Managsuon nagtinigbasay usa kanila ang patay diha-diha samtang ang maguwang wala na kaabot sa tambalanan human gidali paghatod dinhi sa dakbayan sa Sugbu.

Ang panagbangi sa duha mahitungod lang kini sa yuta nga kabilin sa ilang mga ginikanan.

Nahitabo ang krimen sa miaging gabii sa Buguil usa ka bukirang barangay sa Moalboal, 13 ka kilometro ang gilay-on gikan sa Poblacion.

Si PO2 Emerito Sansan nga nahinabi sa Banat News miila sa manghod nga namatay mao si Leoncio Badonio hingkod ug residente sa Manga, Alcantara.

Samtang ang maguwang nga si Vicente Badonio nagpuyo sa Buguil ang gidali paghatod sa Badian District Hospital ug gibalhin unta sa Vicente Sotto Memorial Medical Center sa dakbayan sa Sugbu apan sa pag-abot sa Carcar nakabsan kini sa kinabuhi.

Base sa pasiunang imbestigasyon ni SPO2 Jose Tacoloy nasayran pasado alas 7:30 sa gabii miabot ang manghod nga si Leoncio kinsa mituyo og adto sa pinuy-anan sa iyang maguwang nga gikatahong nanimaho og ilimnong makahubog.

Sa pagsaka ni Leoncio tarong kaayong nangayo'g sundang sa iyang maguwang.

Sa dihang gihatagan kini sa gipangayong sundang ug nadawat na diha sa iyang kamot walay daghang pangutana gitigbas ni Leoncio si Vicente sa nagkadaiyang bahin sa kalawasan.

Bisan nasamdan si Vicente ug nagkadugo nakahigayon pa kini og ilog sa sundang nga gigamit sa manghod pagtigbas kaniya ug nakabawos hinuon apan fatal ang pagkaigo ni Leoncio.

Si Leoncio naantimano pagkaigo sa ulo, walang abaga ug walang kamot nga maoy hinungdan sa hinanali niining kamatayon.



Samtang si Vicente daling gidala sa district hospital sa Badian apan gumikan sa grabeng samad nakabsan kini sa kinabuhi.

Matud ni PO2 Sansan nga ilang naabtan ang patay'ng lawas ni Leoncio nga nagbuy-od sa salog sa panimalay sa iyang maguwang.

Ilang nasayran nga dugay na diay'ng nagkabikil ang duruha mahitungod sa yuta sa ilang mga ginikanan nga miresulta hinuon sa duguong panghitabo.

Ang sundang nga maoy gipulipulihan og gamit sa duruha nga may gitas-on 18.5 ka pulgada ang gi-turn over sa asawa ni Vicente ngadto sa buhatan sa kapolisan.