Duha ka edipisyo naugdaw

Naugdaw ang duha ka mga edipisyo nga gihimong bodega ug boarding house diha sa Aznar Road sa sitio San Juan sa barangay Sambag Uno kagahapon sa hapon.

Ang alarma nadawat sa kabomberohan sa dakbayan 1:41 sa hapon diin milanat og 25 ka minutos una pa kini makontrolar sa kabomberohan.

Ang naugdaw nga mga balay mao ang usa ka dos-andanas nga boarding house ug laing tres-andanas nga balay nga gipanag-iya ni Antonio Alego.

Nagsugod ang kalayo diha sa tres-andanas nga edipisyo nga gawas nga gihimong bodega, duna sad kini mga paabangang mga lawak para sa mga tinun-an.

Sumala pang SFO2 Frank Donozo, ang duty fire investigator ang tres-andanas nga balay gihimong bodega sa mga tempura,fishball ug "takuyaki" nga negosyo ni Alego.

Si Cebu City Fire Marshal Ismael Codilla mitug-an sa Banat News nga posibleng ang pagluto og fishball diha sa silong gubaon ang refrigerator maoy nakaingon sa sunog.

"Naay gihisgutan nga duna refrigerator nga gubaon nga bag-ong giayo ug kadtong dunay nagluto og fishball pero ato panang subayonon," asoy pang Codilla.

Ang mga sikbit nga kabalayan naluwas tungod sa mga firewalls nga gitukod diha sa ilang paril, lakip na niini ang Harry Noel Apartment sa luyong bahin sa nasunogan.

Ang barangay Disaster and Fire Brigade sa Sambag Uno pinanguluhan ni Romeo Gulfan ug mga sakop nga unipormadong volunteers dali usab nga miresponde ug mitabang sa pagkontrolar sa mga tawo ug miabag sa pagpasulod sa mga fire trucks diha sa maong lugar.

Pipila sa mga firetrucks diha na miagi sa mismong tunghaan sa South Western University aron mapadali ang pagsirkulo sa nasunog nga balay aron di makakatap sa atbang ug tupad nga kabalayan.

Matud pang Donozo nga kusog ang hangin niadtong tungura apan gumikan sa mga firewalls wala makatapon ang kalayo dali usab nga napasiritan og tubig ang kaatbang nga mga balay.

Usa ka bombero nga si Ricardo Pog, 20, sa Sto. Niño Fire Bridge ang nasamad sa ulo, samtang nasamdan usab sa tuong tiil ang residenteng si Rey Eborita, 27, mikabat sa P450 mil ang danyos niini.

Mao na kini ang ikaupat nga dakong sunog sa Metro Cebu sulod ning bulana.