Mga hinabang sa nasunogan nangabot

Mga biktima sa sunog sa Guizo ug Mantuyong sa Mandaue giuwan sa daghang hinabang human ang mga nagkadaiyang pundok sa katilingban ug mga ahensiya sa kagamhanan makapadangat niini.

Naglakip sa mga mipadala og mga hinabang mao ang Bureau of Customs (BOC), Mandaue City Chamber of Commerce and Industry, mga relihiyosong pundok ug uban pa nga misanong sa panawagan sa mga opisyal sa Mandaue.

Si Jonkie Ouano nga maoy pangulo sa Barangay Affairs and Coordinating Office (BACO) nga gikahinabi sa Banat News miingon nga lakip sa ilang gipaningkamutan mao ang pagtukod og balik sa kabalayan sa mga biktima sa maong lugar.

Dugang pa niya nga ang nadawat sa mga biktima nga 228 ka bandol sa mga ukay-ukay nga gidonar sa BOC kabahin lamang sa gipadala nga hinabang sa maong ahensiya sa kagamhanan sanglit may mga construction materials pa man nga isunod sa pagpadala.

Si kongresista Nerissa Soon-Ruiz nga unang higayon kuyog ni Ouano sa pagpang-apod-apod sa ukay-ukay nga nagsugod sa alas 2 ang takna sa hapon sa miaging Sabado.

Matud pa ni Ruiz nga gikatakda untang ipadala sa BOC sa maong binandol nga ukay-ukay ngadto sa Leyte apan wala mahinayon tungod kay nag-una man ang panginahanglan niini sa mga biktima sa sunog sa Mandaue.

Si Ouano miingon nga unang mipadala og hinabang alang sa mga biktima nga mga sinakong bugas ug mga linatang pagkaon, noodles, banig, habol mao si Gobernador Gwendolyn Garcia.