Laing sunog miigo sa Mandaue

Laing sunog na usab ang milamoy sa 15 ka mga stalls sa merkado publiko sa dakbayan sa Mandaue kagahapon sa kaadlawon diha sa dalan Ceniza sa barangay Mantuyong dili layo sa nasunog nga sitio sa maong barangay pipila pa ka adlaw ang milabay.

Base sa imbestigasyon ni SFO1 Roy Garcia sa Mandaue City Bureau of Fire Protection nasayran nga nagsugod ang kalayo sa pwesto ni Linda Maquilan.

Giingong usa ka Ramonito Arcenal ang nagluto ug mongos gamit ang sugnod nga kahoy diha sa pwesto ni Maquilan ug wala na mabantayi nga mikatap ang kalayo diha sa bungbong sa sug-angan.

Ang mga kasikbit nga mga stalls naapil sa pagkasunog gumikan kay mugna ra kini sa mga kahoy ug ubang matang sa mga materyales nga light materials.

Hinuon sa maong sunog, way gikataho nga nasamdan o naangol apan gibana-bana nga mokabat sa 75 mil ka pesos ang danyos sa maong sunog.

Nadawat sa kabomberohan ang sunog mga 12:19 kagahapon sa kaadlawon ug gipaubos kini sa 1st alarm ug nakontrolar kini sud sa 3 minutos.