.38 Gi-um-om sa lolo

Lolo naghikog ug namatay human niya gi-um-om ang sumbohan sa armas diha sa iyang baba sulod sa kuwarto sa miaging adlaw pasado alas 11:30 sa buntag sa Sitio Camolinas, Poblacion Cordova, Cebu.

Ang naghikog ug namatay giila sa kapolisan nga si Resando Buenaventura, 65, minyo, ug nagpuyo sa nahisgutang lugar gamit niya ang .38 snubnose paltik nga rebolber sulod sa iyang kuwarto.

Si Sr. Insp. Bonifacio Tecson, hepe sa Cordova nga nahinabi sa Banat News niingon nga iyang naabtan si Buenaventura nga nagbuy-od sa gihigdaan diha sa gipuy-an niining panimalay.

Matud ni Tecson katapusang nakit-an sa mga anak nga misulod sa kuwarto ang ilang amahan apan dangtan og pila ka gutlo nakadungog sila og usa ka buto sa armas nga naggikan sulod sa kuwarto.

Daling gisusi ug giablihan ang pultahan sa mga anak apan ilang nakita nga nagpusil kini diha sa iyang baba.

Wala makagawas ang bala sa .38 human walay nakitang exit sa bala ang kapolisan.

Narekober sa kapolisan ang .38 snubnose, upat ka buhing bala ug usa ka empty shell duol sa patay'ng lawas ug gituohan nga maoy gigamit ni Buenaventura.

Matud ni Sr. Insp. Tecson nga kanunay maguol si Buenaventura sa iyang sakit tungod kay pirme lang magbanhod iyang tiil tungod sa diabetes.

Gisuwayan pa og dala sa Opon District Hospital apan gideklarar kining patay na dihang naabot sa maong tambalanan.

Ang patay'ng lawas ni Buenaventura wala na ipa-autopsy sa mga kabanay niini.