Manager sa KTV dala'g armas sikop sa SWAT

Nasikop sa mga sakop sa Special Weapon and Tactic (SWAT) ang floor manager sa usa ka balay kahilayan kinsa giingong nagdala og armas niadtong milabay'ng gabii diha sa Ibabao, Basak, dakbayan sa Lapu-Lapu.

Ang suspetsado giila sa mga polis nga si Roy Florentino, 47, taga T. Padilla niining dakbayan floor manager sa usa ka KTV Karaoke Bar nga nahimutang sa maong lugar.

Si Florentino gisikop nila ni PO3 Edmond Melendres, PO2 Jomer Pepito human kini gireklamo sa usa ka Judy Ann Estrella, hingkod ang panuigon residente sa dakbayan sa Lapu-Lapu.

Nakuha nila ni PO3 Melendres ang kalibre .45 nga pusil uban sa magazine niini nga puno sa bala.

Ang kasong kalapasan sa Akta Republika 8294 kun ilegal nga paghupot sa armas ug Comelec gun ban ang kasong ipasaka sa kapolisan batok ni Florentino kinsa nagtingkagol karon diha sulod sa Lapu-Lapu police detention cell.