Gibana-banang 1000-2000 ka pamilya ang naapektohan sa maong sunog.
Ang biktima mao si Jose Araneta, 38, residente sa nahisgutang lugar.
Si Araneta gikatahong gibadlong sa iyang maguwang nga si Delsa nga pagawason gikan sa tindahan sa ilang inahan apan giingong wala kini mamati sa iyang igsoon.
Usa ka bombero ang mipasirit og tubig ni Araneta para mogawas gyud kini sa tindahan dihang nagkaduol na ang kalayo sa nahimutangan niini apan wala gihapon nanumbaling niini ang biktima hinungdan nga napaig kini.
Gikataho usab nga ang sunog nagsugod sa mga alas 3:30 sa hapon ug milabay na lang ang kapin sa duha ka oras hangtud sa oras niining pagbalita wala pa gyud mapawong ang kalayo.
Base usab sa taho nga ang kalayo nagsugod diha sa balay ni Tery Bugnay diin ang linya sa ilang kuryente ang kalit lang mi-spark.
Ang panimalay ni Bugnay wala pa mahuman ang pagtrabaho niini.
Ang kabomberohan nga nakadawat dayon sa alarma misuway sa pagkutay sa ilang hose para mabombahan dayon og tubig ang mga balay nga nasugdan sa pagkaon sa kalayo apan naglisod kini tungod sa kagamay sa agianan.
Si Senior Superintendent Alexander Abadinas, director sa kapolisan sa dakbayan sa Mandaue nagpakatap og mga polis diha sa lugar nga nahitaboan para maayudahan ang mga nasunogan.
Ang Banat News misuway sa pagtawag ni Mandaue City Fire Marshall Oscar Mayol para makuhaan kini og dugang detalye kabahin sa maong insidente apan dili makontak ang iyang telepono.