Matud pa ni Diosdado Cayme, kanhi presidente sa Provincial Employees Association of Cebu (PEACE) nga duha ka mga kauban niyang dalaga nga staff sa Provincial Planning and Development Office (PPDO) maoy tigpatanto sa mga kawani diha sa Kapitolyo diin ang transaksiyon niini panahon sa oras sa tingtrabaho ginamit pa ang telepono sa maong opisina.
Gisaway ni Cayme si Engr. Adolfo Quiroga, ang hepe sa PPDO gumikan kay wala kini makabadlong sa iyang duha ka mga sakop nga dalaga nga klaro man unta kaayo ang matag adlaw niining transaksiyon diha sa iyang buhatan ug nagpakabuta-bungol lang bisan paman kun daghan na ang nakahibalo niini.
Si Cayme dihang nahinabi sa Banat News miingon nga nanghinaot siya ug ang ilang kaubanan nga mahimoan kinig aksyon sa mga kadagkuan sa Kapitolyo aron usab mahunong na ang pagpatanto diha sa mga kawani nga maoy makapasamot sa pagkaut-ot sa mga suholan niini gumikan sa kalas usab sa interes niini gani ang uban ibilin pa ang ilang mga automated teller machine (ATM) card.
Subay niini, si Bise Gobernador Gregorio Sanchez misalikway nga ang maong isyu matud pa puro lang kini mga hungihong gumikan kay ang mga kawani sa Kapitolyo anaa naman karo'y kautangan nga ubos kaayo ang interes nga mao ang CFI Multi-Purpose Cooperative.
Hinuon si Sanchez wala na mohatag pa og dugang detalye kun unsay pagahimuong aksyon sa mga sakop sa hunta probinsyal sa lalawigan sa Sugbu labot sa maong isyu.