Nagduwa'g 'tong-its' gipatay

Gipusil patay ang usa ka 36 anyos nga lalaki diha sa sugalan samtang nagduwa og tong-its pasado alas 11 sa gabii niadtong Sabado sa gabii diha sa General Climaco, Toledo City Cebu.

Segun sa report sa kapolisan nga nidangat sa Provincial Police ang biktima giila nga si Rogelio Habasa Decena, minyo ug nagpuyo sa nahisgutang dapit.

Samtang ang suspetsado kinsa gitumbok nga mipusil sa biktima nailhan sa kapolisan nga si Felomino Binlot Casayas, 32, minyo, residente sa Artiwi, Climaco sa samang dakbayan.

Ang biktima nakaangkon og samad pinusilan diha sa iyang buko-buko ug nilapos sa iyang dughan duol sa kasingkasing gamit ang wala matinong kalibre sa armas nga maoy gigamit sa suspek.

Sa imbestigasyon sa kapolisan nagbutyag ang biktima nagduwa og baraha uban sa iyang mga higala sa usa ka payag lakip ang suspek.

Nitumaw ang wala pagsinabtanay tali sa biktima ug suspek ug kalit kining mibunot sa dala niining armas si Casayas ug gipusil ang biktima nga nagtalikod.

Diha-diha nakabsan sa kinabuhi ang biktima tungod sa bala nga milusot sa iyang dughan.

Gituohan sa kapolisan nga wala magkasinabot ang biktima ug suspek kabahin sa pusta sa ilang pagduwa og baraha.

Human sa pagpamusil si Casayas daling nakasibat palayo sa lugar ug wala na maabti sa niresponding kapolisan.