Ouano nanghagit og debate 'linabayay'g lapok' ipahunong

Kampo sa mga Ouano mihangyo sa ilang mga kaatbang nga hunongon na ang pagnilabayay og lapok samtang nagkaduol na ang pagsugod sa kampanya.

Matod pa ni Jonjie Gonzales ang Press Relation (PR) Consultant sa pamilyang Ouano nga gusto ni Mandaue Mayoralty aspirant Jonkie Ouano nga hunongon na ang paglinabayay ug lapok sa mga kandidato ug mobatbat nalang sa ilang mga programa panggoberno ilabi na sa umaabot nga kampanya.

Gihagit hinuon sa mga Ouano ang mga kaatbang sa usa ka debate ug iladlad sa mga lakang nga pagahimoon kung kini moserbisyo na sa katawhan sa dakbayan sa Mandaue.

Pinaagi niini, sa pagpresentar sa ilang mga plataporma de goberno sa mga kandidato atol sa pagpangampanya dinhi na mopili ang katawhan kung kinsa ang ilang tuhoan nga sensiro sa kalambuan sa dakbayan sa Mandaue.

Usa sa mga gipasangil nga giingong walay basehanan nga gihimo sa kampo sa mga Cortez mao ang pasangil nga sila ni-harass sa mga supporters nga mga traysikol drivers nga diin miakusar nga masuko ang kampo sa mga Ouano sa mga drivers kung dili mosugot nga butangan og sticker ni Jonkie Ouano nga nagkanayon nga "I Love Mandaue-Jonkie Ouano". Dugang pa niini ang nahitabong pagkulata sa tigpaluyo ni Cortez , pagtaktak sa iyang staff sa opisina, pagtangtang sa goal sa basketbolan sa gym sa Umapad nga nagdala sa iyang pangalan, pagputol sa kuryente sa barangay hall sa Centro ug ang pagpanghulga sa mga traysikol drayber nga modumili sa pagpapilit sa sticker niini.

Ang maong alegasyon hugot nga gipanghimakak ni Gonzales gumikan kay hangtod karon daghan sa mga residente sa dakbayan sa Mandaue ang kanunay nga manawag sa ilang buhatan nga mangayo og stickers ug kining tanan boluntaryo kini nga gidawat sa mga drivers ug ang uban mao pay mangayo.