Usa patay, 5 angol sa aksidente

Usa ang patay ug lima ang naangol duha niini nabalian sa ilang tiil dihang duha ka motorsiklo nagkabangga ug pagkahuman nalatayan sa ligid sa ten wheeler truck nga giobirtikan sa usa ka motorsiklo.

Nahitabo ang aksidente sa kadalanan pasado alas 5 sa miaging hapon diha sa Jaclupan, Talisay City.

Ang namatay giila sa kapolisan sa Talisay nga si Paterno Tao, 21 anyos, ulitawo, kinsa maoy nagmaneho sa Kawasaki GS-1625 ug naangol ang ig-agaw sa namatay nga angkas sa motorsiklo nailhan nga si Francisco, 27 ug Ricardo, 23 ug Jelou Baculi, 13 anyos, pulos taga Jaclupan Talisay.

Samtang ang mga sakay sa laing motorsiklo nga gikabangga mao ang YO-4720 nga gimaneho ni Ahmid Nacua uban usab sa iyang ig-agaw nga si Leoncio Nacua.

Ang lima gihatod sa Vicente Sotto Memorial Medical Center.

Sa pasiunang imbestigasyon ni PO3 Elmer Saladas sa Traffic Division sa Talisay nasayran nga ang motorsiklo nga gimaneho ni Paterno gikan sa Jaclupan ug paingon sa Tabunok.

Pag-abot sa nahitaboan si Paterno nagsunod og ni-overtake sa Isuzu Forward GWS 310 nga gimaneho ni Alexander Cabillon Briones apan igo lang nakalusot si Paterno diha sa atubangan sa Isuzu Forward nagkasugat sila ni Nacua.

Si PO1 Stephen Sefuesca nga nahinabi sa Banat News niingon human sa head on collision sa duha ka motorsiklo si Paterno ug ang mga angkas niini nangalabay ug nangalagpot sa kalsada apan naabtan gyud sa pangunahang ligid si Paterno sa Isuzu Forward ug naligsan hinungdan sa hinanaling kamatayon niini.

Human sa aksidente si Briones misurender sa kapolisan sa Talisay.