Ang nadakpan gitago lang sa iyang bansagon nga si Jeprox, 16 anyos, apan base sa report sa mga polis 19 anyos na kini ug residente sa sitio Tonublapok sa Inayawan.
Si Jeprox miangkong miyembro sa Bloods Gang ug kalima na ka higayon siyang nadakpan tungod sa kasong pagpangawat ug nabilanggo na sa Operation Second Chance sa Kalunasan.
Nadakpan niadtong Sabado sa gabii si Jeprox diha sa sitio Tayud sa Basak-Pardo human maalarma ang kapolisan kabahin sa armadong mga batan-on nga nagginukuray diha sa maong lugar.
Si CCPO director, Sr.Supt. Patrocinio Comendador kinsa nakamonitor sa iyang handheld radio niadtong tungura daling miresponde sa lugar ug naabtan niyang gialirungan sa MPG ug mga sakop sa Pardo police station ang usa ka panimalay sa maong dapit.
Si Comendador ug ang iyang back-up nga polis nga si PO2 David Naraja uban nila ni SPO3 Edgar Abangan, SPO3 Sanrico Jolejole, PO3 Muaña Barral ug PO2 Arnel Sanchez sa Pardo police station gisaka nila ang maong balay.
Diha nila maabti si Jeprox nga naghapa sa sawog ug dihang gipahayang gidat-ulan niini ang usa ka kalibre 38 rebolber nga paltik nga may duha ka buhing bala ug ingon man usa ka kutsilyo.
Ang alarma kabahin sa armadong grupo ni Jeprox ug usa ka giilang Ruben Pacquiao nga dunay gigukod sa maong dapit apan si Pacquiao nakaeskapo.
Matud pa sa hepe sa Pardo police station nga si Sr.Insp. Aureo Sanchez sa pakighinabi sa Banat News nga si Jeprox ug ang grupo niini dugay na nilang gipangita tungod kay nabaniog na kaayo ang ilang grupo nga maoy utok sa mga pagpanglungkab og mga balay sa ilang hurisdiksyon.
"Nakaila na mi nila niadto pa, pero idlas lang gyud kaayo, nataymingan lang gyud siya adtong adlawa," asoy pang Sanchez.
Sa gihimong follow-up operation diha sa safehouse sa lider sa grupo ni Jeprox nga si Joseph Suerte alyas Judo diha sa Tayud-Kanipaan sa Basak-Pardo nakaeskapo usab kini human giingong miambak sa kanipaan.
Nakuha diha sa safehouse sa grupo ang 17 ka mga resibo sa mga giprendang kinawat nga mga alahas.
Samtang sa dugang operasyon pagrekober sa mga kinawat nga mga butang diha sa mga panimalay sa Tayud, Basak - Pardo narekober ang usa ka 21 inch nga Panasonic nga TV, onse ka mga speaker ug surround speakers, lima ka mga DVD,VCD ug CD components, usa ka DVD JVC brand nga player ug usa ka NEC laptop.
Duha ka mga biktima ang miila na sa ilang mga gamit nga sila si Bernadita Bolodo Basamayor, nga giingong pag-umangkon ni Police Regional Office 7, chief of staff , Sr.Supt. Drusillo Bolodo nga gikawatan og mga alahas.
Samtang ang laing biktima nga miila sa laptop mao si Esterlina Garong, nga taga Skyview Villa, Inayawan, usa ka kawani sa Cebu City Health Department.
Laing kauban ni Jeprox nga pasakaan og kaso mao ang usa ka mahuyang nga menor de edad nga giingong maoy manulod og mga balay sa adlawan.
Miangkon si Jeprox sa mga tigbalita nga daghan ang miyembro sa ilang grupo apan lahi-lahi og oras kun mangigo diin ilang isulod ang mga kinawat sa sako ug isakay og taxi.
Gipanawagan sa kapolisan ang mga biktima sa pagpangawat sa Talisay ug mga kabarangayan sa habagatang bahin sa dakbayan sa pag-ila sa narekober nga mga appliances.