Alvin modesisyon ugma

Mahibaw-an na ugmang adlawa kon mohinayon ba o dili si kanhi mayor Alvin Garcia pagpapili og balik atbang ni Mayor Tomas Osmeña sa Bando Osmeña Pundok Kauswagan (BOPK) karong eleksyon.

Gibutyag ni Garcia dihang na-interview sa usa ka estasyonan sa radyo nga mopatawag siya og tigum karong gabii sa iyang mga political leaders, ug suod nga mga higala ingon man sa iyang pamilya aron konsultahon sa posible niyang pagpapili og balik sa umaabot nga pinili-ay.

Ang resulta unya sa mao niyang konsultasyon maoy iyang basihan pagpakanaug og desisyon kon dawaton ba niini ang subling pagpakig-atbang kang Osmeña.

Gitug-an ni Garcia nga hangtod karon wala pa usay nisugot sa mga longlist niya pagka konsehal sa north district apan kombinsido ang kanhi mayor nga mausab ang mao nilang desisyon kon pananglit makahukom siyang molansar og balik.

Gitug-an ni Garcia nga wala hinuon siyay problema sa ilang mga kandidatu pagka konsehal sa South district tungod kay dugay na kining giporma ni kanhi Cebu City Sports Commissioner Jonathan "Atan" Guardo nga maoy moatbang ni Kongresista Antonio Cuenco.

Hinuon giangkon ni Garcia nga posibleng wala silay ibutang nga kontra ni Kongresista Raul del Mar sa north district tungod kay matod niya walay bisan usa nga niuyon sa ilang gipilian nga maoy moatbang kang del Mar.

Si Garcia una nang nipadayag nga dili na mag-apil apil sa politika hangtud nga ma-computerize ang pinili-ay.

Si Garcia padayong nikwestyon sa iyang duha ka higayon nga kaparotan ngadto kang Osmeña niadtong 2001 ug 2004 election.