Simbahan sa Mandaue nasunog

Mokabat sa P260,000 ang danyos sa nahitabong sunog sa duha ka lawak sa Assembly of God nga simbahan sa dalan A.C. Cortes, Cambaro, Mandaue nga miangin usab sa 15 ka panimalay ug 12 niini ang hingpit nga naugdaw.

Ang alarma gitubag sa kabomberohan sa maong dakbayan alas 10:58 ang takna kagahapon sa buntag ang hingpit usab nga nakontrolar sa paglabay sa 12 minutos.

Si Mandaue City Fire Marshal Oscar Mayol, mipaubos sa 3rd alarm sa maong sunog nga maoy hinungdan sa pagtubag usab sa ubang kabomberohan sa dakbayan sa Sugbo ug silingang lugar.

Si F02 Cefriano Codilla, imbestigador sa kabomberohan sa dakbayan nga gikahinabi sa Banat News miingon nga nagsugod ang kalayo sa Sunday School sa maong simbahan ug mitapon kini sa pastoral house.

Dugang pa niya nga dali kaayong nakatapon sa silingang kabalayan sa maong lugar ang kalayo nga maoy hinungdan sa hingpit usab nga pagkaugdaw sa 12 ka panimalay nga pulos ginama sa light materials.

Si FO2 Codilla miila sa mga panimalay nga nasunog mao ang gipanag-iya nila ni Felicidad Mendoza, Phelma Pepito, Martin Cosep, Eduardo Jayme, Diling T orreon, Ramil Torreon, Riza Gil, Recel Torreon, Eva Navarro, Edwin Garciano ug Michael Porcadilla.

Samtang ang nakasinati og kadaut nga wala mahingpit og kaugdaw mao ang mga panimalay nga gipanag-iya nila ni Conchita Monares, Gloria Bongo ug Milagros Campaya.

Si F02 Codilla miingon nga nagpadayon pa ang ilang pakisusi sa hinungdan sa kalit nga pag-ulbo sa kalayo.

Giklaro niya nga atol sa kalit nga pag-ulbo sa kalayo walay gikatahong naangol ug kinabuhing nakalas.

Sa nasayran nga ang maong sunog kagahapon maoy ikaduhang sunog nga nahitabo sa dakbayan sukad magsugod ang fire prevention month karong tuiga.

Ang unang sunog nga gialarma sa kabomberohan sa maong dakbayan mao ang pagkasunog sa usa ka pabrika sa barangay Labogon sa maong dakbayan nga nakasinati usab og gamay nga kadaut.