'Notadong' car artist nadakpan human mangigo

Usa ka gipasanginlang notadong manglungkabay og awto ang nasikop human matultuli sa kapolisan ang iyang giestambayan tungod sa reklamo sa usa ka babaye nga nabiktima niini niadtong Biyernes.

Ang gidakop giilang si Mark Sanchez,taga sitio Zapatera, Bario Luz ning dakbayan kinsa nadakpan sa grupo nila ni Inspector Michael Bastes uban nila ni PO3 Jeffrey Diola, PO3 Francisco Ortiz, PO3 Roel Cosido ug PO1 Justino Paragados sa Theft and Robbery Section.

Usa ka Maria Cecilia Chiu,35, nga taga Basak, LapuLapu ang midangop sa buhatan sa TRS ug mireklamong gilungkab ang iyang awto nga gi-parking diha duol sa St.Therese Parish sa Lahug .

Mireklamo siyang gikawat ang iyang kolor brown nga bag nga may sulod nga mga importanteng IDs, duha ka cellphone ug uban pang mga personal nga gamit.

Ang grupo ni Bastes daling miresponde sa maong dapit ug dangtan pagkaalas 5 sa hapon nakuha sa grupo ni Bastes ang pangalan sa suspek pinaagi sa Parish Security Group.

Ning tungura misubay sa Bagong Buhay Rehabilitation Center ang TRS diin ilang nakuha ang kumpletong profile ni Sanchez diin natino nga kaniadto napriso na kini, ang hulagway niya gipakita sa kapolisan sa PSG ug nakumpirmar nga siya maoy tawong milungkab sa sakyanan sa biktima.

Si Sanchez nadakpan dayon diha sa usa ka volleyball court sa Salinas Drive Extension sa nahisgutang barangay tungod sa maong impormasyon.

Narekober ang brown shoulder bag nga may sulod nga driver's license,Pag-ibig ID, BPI ug UCPB ATMs,SSS ID, ug uban pang personal nga gamit ni Chiu diha na sa sapa sa Zapatera.

Samtang narekober usab pagbalik sa kapolisan ang duha ka cellphone sa biktima diha na sa usa ka cellshop sa Banilad ug Labucay,Carbon Market sa Ermita gawas lang sa kwartang P100.

Atol sa pagrekisa kang Sanchez, nakuhaan usab kini og duha ka aluminum foil ug usa ka linikit nga tissue paper.