Ang biktima kinsa kritikal nga midangat sa Cebu City Medical Center apan nakabsan ra gihapon sa kinabuhi giilang si Nomeriano Noya,61, taga San Antonio Road sa Guinsay, dakbayan sa Danao.
Usa ka wala mailhing lalaki nga gibana-banang 50 anyos na ang edad nga nagsuot og fatigue nga sweat shirt ug khaki nga shortpants maoy gitumbok nga mipusil sa biktima.
Sa imbestigasyon ni SPO2 Jay Yballe sa Homicide Section mitumaw nga si Noya bag-uhay pang mibayad sa iyang utang sa usa ka vendor diha sa kilid sa maong kan-anan.
Sa iya nang paglakaw pipila pa ka lakang gikan siya nakabayad nasugatan niya ang suspek ug walay daghang estorya nga mipusil kaniya diha sa baba.
Ang biktima misuway og atras palayo sa suspek apan nalimbuwad kini samtang ang mamumuno yano rang milakaw subay sa dalan Pelaez padulong sa P.del Rosario.
Ang mirespondeng mga sakop sa Mobile Patrol Group nga car 015 ug car 016 mao nay midala sa biktima sa CCMC apan pagka-alas 9 sa gabii nakabsan kini sa kinabuhi.
Ang biktima naanad nang makigpundok sa uban pang mga mamalitay og mga scraps diha sa maong kan-anan ug nasuhito na kanila ang mga vendors sa palibot.
Matud pa sa nakuhang impormasyon sa mga imbestigador nga niadtong Marso 1 ning tuiga nadunggan ang biktima nga dunay gikaaway sa cellphone diin misulti kini og "Ayaw ko'g hadloka bay,di ra ba ko mahadlok ninyo."
Si Yballe nagkanayon nga duna na silay gisubay nga anggulo sa hitabo apan di pa ikabutyag samtang wala pa mapatawag ang mga personaheng posibleng nalambigit sa krimen.