One Cebu Party ni Gwen manumpa sa Kampi

Manumpa karong gabii ang mga sakop sa One Cebu Party nga panguluhan ni Gobernador Gwendolyn Garcia ug Bise-Gobenador Gregorio Sanchez Jr. ngadto sa Kabalikat ng Malayang Pilipino (Kampi) sa kauluhan.

Wala hinoon gibutyag ni Garcia kon kinsa sa mga nakapanumpa nga sakop sa One Cebu Party ang mouban kanila sa paghural sa Kampi nga pasiugdahan ni Presidente Gloria Macapagal Arroyo.

Nunot niini, mailhan na ang liderato sa Kampi sa Sugbu human gikataho nga gitudlo na si Bokal Carmiano Kintanar isip provincial chairman sa Sugbu.

Usa sa tahas sa provincial chairman mao ang paghatag sa nominasyon sa mga lokal nga kandidato gikan sa gobernador hangtud na sa mga mayor ug konsehal sa kalungsuran ug siyudad.

Si Kintanar mopapili sa pagka-kongresista sa segundo distrito atbang sa amahan sa gobernador nga si kanhi Gob. Pablo Garcia.

Hinoon walay nakitang problema si Kintanar sa maong kalamboan sanglit kabubut-on kini sa Presidenti nga modaku ang grupo.

Nagtuo si Kintanar nga may mga kausaban pa sa han-ay sa Kampi sa lalawigan sa Sugbu.

Wala hinoo'y gikuptan nga appointment si Kintanar apan matud pa niya nga gihimo ang kompirmasyon atol sa convention sa Kampi sa kauluhan sa wala pa naumol ang One Cebu Party.

Buot lang ni Kintanar nga kon unsa man ang kausaban sa han-ay sa Kampi sa lalawigan nunot sa pagtapon sa One Cebu Party, dili sila mawani sa segundo distrito.

Nasayran nga human giumol ang One Cebu Party, nibiya usab dayon si Garcia ug kaubanan sa Lakas Party nga maoy ilang national affiliation.