Siyam naangol sa aksidente

Siyam ka mga tawo ang nangaangol human mobalitok ang ilang gisakyang PUJ dihang naigo sa laing PUJ diha sa may crossing sa dalan Colon ug Boromeo kagahapon sa buntag.

Usa sa mga drayber mipasangil nga wala mosunod ang nabanggaang PUJ sa traffic light hinungdan nga naigo niya kini, ang duha ka sakyanan parehong nagbiyahian og Bulacao.

Si PO3 Porferio Lim, Jr. sa Traffic Group sa pakighinabi sa Banat News nagkanayon ang nagbangga mao ang usa ka L-300 passenger type nga PUJ nga nagtangag og plakang GVJ-417 nga gimaneho ni Arnel Sumating ug ang usa ka Isuzu Elf passenger type nga gimaneho usab ni Dominador Enad nga may plakang GXB-825.

Matud pang Lim gikan sa Bulacao ang PUJ ni Sumating nga may kargang siyam ka pasahero subay sa dalan Boromeo niadtong tungura dihang naigo sa PUJ ni Enad kinsa niadtong tungura mitabok na usab sa dalan Colon padulong sa Boromeo.

Gumikan sa kakusog sa panagbangga nabalitok ang PUJ ni Sumating ug naangol usab ang mga pasahero niini gumikan sa daghang mga bun-og ug pangos sa kalawasan.

Giila ang mga naangol nga milandig sa Cebu City Medical Center mao sila si Irene Agono, 27, taga Inayagan,Naga; Roldan Herbias, 18, taga Tulay, Minglanilla; Ricardo Arcepe, 60, taga Bulacao Pardo;Mercedita Fe Espinar, 44, taga Tierra Grande, Camella Homes sa Talisay; ug Hermie Piguis, 29, taga Poblacion, Talisay.

Lakip sa gidala sa CCMC mao sila si Vicenta Panuncia,49, taga Jaclopan,Talisay; managkabanay nga Reynaldo Teleron,29, ug Luzviminda Teleron,32, pulos taga dalan Echavez sa Lorega-San Miguel ning dakbayan ug Arnel Lasida,20, taga Abuno, Minglanilla.

Bugtong ang drayber sa Isuzu Elf nga si Enad pa ang mipakita sa buhatan sa Traffic Group kagahapon matud pang Lim. Mialegar si Enad nga ang nabanggaan niining PUJ maoy milapas sa lagda sa trapiko maong naigo niya kini.

"Go naman kuno siya, sa iyang alegasyon kining (L300 PUJ) maoy ni-beat sa light," asoy pang Lim apan miangkon nga dili pa klaro ang tanang pamahayag sanglit si Sumating kasamtangan pang nag-atiman sa mga pasyente ug wala pa kini makahatag og pamahayag kabahin sa insidente.