Ang biktima mao si Norodin Patara, 19, ulitawo ug lumad sa Basak dakbayan sa Lapu-Lapu.
Base sa imbestigasyon nga gihimo ni PO3 Frederick Eslit sa homicide section, si Patara luwan sa usa ka motorsiklo kuyog ang iyang higala nga si Lexter Gonzales niadtong milabay'ng gabii.
Paglabay sa duha sa Sitio Matumbo, Barangay Pusok dunay upat ka mga batan-on ang giingong kalit nga mirakrak kanila.
Matud pa ni Eslit nga posibleng giatngan na si Patara sa upat ka mga batan-on sa maong dapit ug dali kini nga nakasibat human sa pagpamanhig.
Nakuha sa kapolisan ang usa ka slug sa kalibre 9mm ug usa ka tuong pares sa tsinelas nga gituuhang iya sa usa sa mga suspetsado.
Si Patara nga naigo sa dughan ug milahos kini sa luyo gidali pagdala sa tambalanan sa Lapu-Lapu District Hospital ug gibalhin sa VSMMC, apan pipila ka oras nakabsan kini sa iyang kinabuhi base sa pamahayag sa management sa maong tambalanan.
Matud pa ni PO3 Eslit posibleng may kalambigitan ang gang war sa hugpong sa Crips ug Bloods gangs sa dakbayan.
Sayo pa sa kaadlawon sa susamang adlaw mga alas 2:30 ang takna, usa ka Hansel Oporto Diacor, 20, nga giingong sakop sa Crips gang ang gipusil patay sa kauban rang gang member.
Base sa imbestigasyon ni PO3 Abellanosa posibleng adunay pagdumot ang suspetsado ngadto kang Diacor gumikan kay buot na nga mogawas sa Crips si Diacor ug mibalhin sa Bloods gang.
Si Diacor naigo sa likod agi sa usa ka kalibre .45 wa na kini matabang pa human nga gidala sa Lapu-Lapu District hospital human gideklarar nga DOA samtang ang suspetsado yano ra kini nga misibat sa maong dapit human sa maong panghitabo.
Samtang kagahapon sa kaadlawon kalit lang gipaulanan og bala ang duha ka traysikol nga puno og mga pasahero.
Ang nangaangol giilang sila si Bayani Gerson Godinez, 57, taga Gun-ob, drayber sa traysikol; Presco Patalinghug, 36 ;Joel Carballo, 37, lumad nga taga San Carlos, Negros Oriental ug kauban niini nga si Carlito Espra, nga kasamtangang nagpuyo sa maong dapit ug nagtrabaho sa MCIAA isip mga janitor sa MIMS services ug si Anna Flor Berian, 19, nagpuyo sa Seawage, Pusok ug trabahante sa MEPZ.
Sumala pa ni Eslit unom ka mga tao nga luwan sa tulo usab ka motorsiklo ang nagpataka nalang og pamusil sa bisan kinsang tawo nga makita sa maong dapit hinungdan sa pagkaangol sa mga biktima.
Si Godinez samaran sa tuong bukton, si Patalinghug sa iyang tiyan lahos sa luyo nga bahin sa iyang lawas, si Carballo samaran sa iyang duha ka bagtak, si Espra samaran sa tuong bukton ug si Berian naigo sa tiyan ug milapos ang bala sa likod.
Matud pa ni Eslit ang tanan agi sa kalibre .45 diin nakuha sa dapit nahitaboan ang unom ka mga empty shells sa maong kalibre lakip na ang usa ka slug sa maong armas.
Dugang pa ni Eslit nga posibleng panimalos kini sa mga sakop sa Bloods gang human nga usa ka sakop nila ang nakalas sa milabay'ng gabii nga si Patana.