17 anyos naigo sa pagpangrakrak

Duha ka wala mailhing mga tawo nga nagsakay og motorsiklo ang kalit lang namusil sa nagtapok nga mga batan-on ug usa ang naangol niini.

Nahitabo ang pagpamusil alas 9 pasado ang takna sa miaging gabii sa Perez Compound, barangay Alang-Alang, dakbayan sa Mandaue.

Ang biktima mao si Wilson Bantilan Macacero, 17 anyos, ulitawo ug nagpuyo sa maong dapit.

Si PO1 Chester Quiros sa kapolisan sa Presinto 1 sa Centro Police Station nga gikahinabi sa Banat News miingon nga nag-estambay lang ang biktima uban sa mga barkada niini sa gawas sa ilang panimalay.

Matud pa niya nga ang duha ka wala hiilhing lalaki nga nagsakay og motorsiklo ang kalit lang mihunong ug namusil.

Nag-iyahay sa pagpanagan ang nagtapok nga mga batan-on apan naigo gyod sa iyang bitiis si Macacero.

Mipabulhot sa pagpadagan pahilayo sa giluwanan nilang motorsiklo ang duha ka wala hiilhing mamumuno.

Dali nga gidala ang biktima sa Mandaue City Hospital ug padayon karong giatiman sa mga doktor.

Matud pa ni PO1 Quiros nga sa crime scene maoy ilang napalgan ang tulo ka mga kabhang sa kalibre 45 nga armas nga ilang gituohang gikan sa hinagiban sa wala hiilhing mga tawo nga namusil.