Housing program para sa mga media gisugdan kagahapon sa Talisay City

Mga miyembro sa Cebu Newspaper Workers Multi-Purpose Cooperative (Newscoop) nagkahiusa kagahapon sa gipahigayong "test building" sa three model housing units sa San Pio Village diha sa Barangay Dumlog dakbayan sa Talisay.

Ang maong unang tulo ka unit ubos sa sponsorship sa Bethlehem Communities Australia ug sa Habitat for Humanity Foundation kinsa maoy moayuda sa pagpatukod sa low cost housing units.

Ang 40 ka unit sa maong housing project tukoron diha sa 3.3 ektaryang luna sa San Pio Village kinsa ang 40 ka miyembro sa newscoop ang manag-iya sa maong unit.

Ang unang tulo ka unit nakuha na nila ni Joy Ulla ug Faith Maroto sa The Freeman/Banat News sa Circulation Department ug Sally Siso sa Sunstar Daily.

Ang tibook property gipalit sa Bethlehem Communities para sa 360 ka walay pinuy-anan nga pamilya dinhi sa Sugbu.

Gawas sa gitagana nga luna para sa newscoop gipahigayon na ang construction sa ubang housing units diin ang tigdumala niini naghuwat nga makompleto na ang drainage system diha sa lugar para mapuy-an na kini.

Si Melly Verano, manager sa newscoop nagkanayon nga ang tulo ka benificiary ang napili sa gipahigayong raffle niadtong Enero nga nanag-iya sa nahisgutang unang tulo ka units.

Aduna nay 40 ka aplikante nga mga miyembro sa newscoop diin i-raffle kini ngadto sa batch nga napulo tungod kay nagdepende kini sa budget sa newscoop.

Ang duha ka andana nga unit nga adunay 40 metro kuwadrado ang gilapdon sa lote matag usa pabayaran pinaagi sa Pag-ibig housing loan.

Ang mga miyembro kinsa kwalipikado nga makatag-iya sa housing project gikinahanglang motrabaho og 600 ka oras isip "sweat equity" diin 200 oras ang trabahoon sa mismong miyembro ug ang sobrang oras pwede na kung iyang mga paryente o miyembro sa pamilya o ba kaha mokuha siya og trabahador para maoy motrabaho para matuman ang 600 oras nga rekisitos.