'Tulisan' gidemalas naabtan pag-ikyas

Duha ka gidudahang tulisan ang gidemalas human sila madakpi sa nirespondeng mga sakop sa Mobile Patrol Group nga maoy nadangpan sa babayeng ilang gibiktima wala pay usa ka minutos gikan sa ilang pag-ikyas.

Ang nangadakpan giilang sila si Cesar Damaolao alyas Liclic, 24, taga sitio Dita,Pulangbato ug Eddie Tabal, 25, taga Guba pulos mga bukirong barangay ning dakbayan.

Ang duha naabtan nila ni PO1 Bernardo Balo,Jr. ug PO1 Mark Betonio sa car 010 sa MPG diha na sa V.Rama Avenue atol sa ginukdanay nga nagsugod pa sa may R.R. Landon sa barangay Sta.Cruz.

Ang mga suspek gipasanginlan sa mga biktimang sila si Niercy Avais Visitacion, nga taga Sambag 2 ug boardmate niining si Rona Ubas nga maoy milabni sa bag ni Visitacion diha sa dalan R.R.Landon.

Matud pa sa duha ngadto sa kapolisan padulong na sila mamauli dihang ilang namatikdan ang duha nga misunod kanila sakay sa usa ka motorsiklong kolor pula nga may plakang OG-1064.

Ang mga suspek kalit nga milabni sa shoulder bag ni Visitacion apan wala kini niya buhii hinungdan nga nagbinirahay pa sila sa suspek hangtud nga nakuha gyud kini sa mga tulisan ug nangikyas.

Apan wala pa makalayo ang duha naagian nila ni Balo ang duha ug nahibaw-an ang nahitabo ug gitudlo sa duha ang motorsiklong mao pay pagpalayo hinungdan nga nahitabo ang ginukdanay.

Human sila madakpi sa V.Rama narekober kanila ang tanang mga butang sa biktima nga gilangkuban sa bag nga may sulod nga cellphone, class ring, pitaka nga may P106.50 cash ug ubang personal nga gamit. Nakuhaan usab si Tabal og usa ka paketeng may sulod nga gidudahang shabu.

Ang duha gitanggong na karon sa kapolisan alang sa pagpasaka og kaso ugmang adlawa.