Partido Kusug dili pa gihapon kumpleto — Guardo

Si Congressional Candidate Jonathan Guardo sa South District sa Cebu City mikompleto na sa walo ka puwesto sa konsehales niya para sa north district, samtang lima pay klaro alang sa south district ning dakbayan.

Apan giklaro ni Guardo nga sa tungatunga sa buwan sa Marso, makompleto na ang tanang mga kandidato pagka-konsehal sa partido oposisyon alang sa south district.

Hinuon gitino na niya nga basi sa ilang gimitingan niadtong Biyernes sa gabii, si kanhi mayor Alvin Garcia gyuy opisyal nga kandidato sa oposisyon.

Matud pa ni Guardo nga iyang gipasaligan si Garcia nga pabahaan niyag 9,600 ka mga poll watchers ang mga lawak botohanan karong election diin tag 6 niini sa matag presinto ang pabantayon.

Pinaagi niini gipasalig ni Guardo nga maglisod na pagtikas ang ilang kaatbang karong umaabot nga piniliay kay seminaron nila pag-ayo ang ilang mga watchers unsaon pagbantay sa matag presinto aron nga masakpan kon may tikas nga himuon ang ilang kaatbang.

Gihinganlan na niya ang mga konsehal sa ilang kampo sa south district nga mao sila si Jun Navarro, Jun Gabuya, Danny Lim, Jocelyn Caballes ug Atty. Salvador Solima.

Samtang sa north district ang iyang mga konsehal mao sila si Atty. Avenecio Peramide, Atty. Fritz Quiñanola, Ramon Fernandez, Yong Larazabal, Mary Ann delos Santos, Josel Garganera, Dandy Fernan ug usa ka Alcover.

Gitumbok ni Guardo nga ang hinungdan nga natikasan si Garcia niadtong miaging election mao nga tag 3 ra ka watcher niini ang gipakatap sa matag usa sa 1,600 ka polling precincts dinhi sa dakbayan sa Sugbu.

Si Guardo maoy higpit nga kaatbang ni Congressman Antonio Cuenco sa South District, samtang sa north district wa pay klarong kontra si Kongresista Raul de Mar.