Lakas may kandidato na sa mga distrito

May district chairman ug mga kandidato na sa pagka-kongresista ang partido Lakas sa lalawigan sa Sugbu sa tanang distrito apan wala pa'y provincial chairman.

Kini ang gipahibawo ni Bert Emphasis, ang tigpamaba sa partido Lakas sa Central Visayas human sa gihimong pagpang-apod-apod sa appointment sa Batasan Complex niadtong Martes.

Ang chairman sa ikaunom nga distrito nga si Mandaue City Mayor Thadeo Ouano hingpit na nga gihulipan sa iya giilang kaatbang sa politika nga si Bokal Gabriel Luis "Luigi" Quisumbing.

Hinuon matud pa ni Emphasis nga sa unang distrito, wala pa matino ang chairman niini apan posible nga si kanhi Bise-Gobernador John-john Osmeña itudlo kun makahukom kini nga modagan sa pagka-kongresista.

Sa ikaduhang distrito mao si Kongresista Simeon Kintanar, sa ikatulong distrito mao si Kongresista Antonio Yapha Jr., sa ikaupat nga distrito mao si Kongresista Clavel Asas-Martinez, sa ikalimang distrito si Kongresista Ramon "Red" Durano VI, ug Quisumbing sa ikaunom nga distrito.

Ang partido Lakas may nominasyon na usab sa mga kandidato sa pagka-kongresista sama nilang Bokal Carmiano Kintanar sa ikaduhang distrito, Bokal Estrella Yapha sa ikatulong distrito, Bogo Mayor Celestino Martinez III sa ikaupat nga distrito, Red Durano sa ikalimang distrito samtang wala pa makahukom si Quisumbing sa ikaunom nga distrito.

Samtang wala pa'y provincial chairman ang partido Lakas, ang matag district chairman mao ang gitahasan sa pagpirma sa nomination sa mga lokal nga kandidato sa tagsatagsa nila ka distrito.