Si Sr. Supt. Vicente Loot, kanhi hepe sa Cebu Police Provincial Office ug asawa ni Daanbantayan Mayor Maria Luisa Loot samtang si retiradong Sr. Supt. Hiram Benatiro, kanhi hepe sa Cebu City Police Office ug karon kandidato sa pagka-konsehal sa habig sa oposisyon.
Midemanda karon og public apology kang Benatiro si Loot human siya pasanginli nga nakit-an nga nagkuyog-kuyog sa mga pulong-pulong sa politika sa iyang asawa nga si Mayor Loot ug anak nga si Sun Shimura.
Matud pa ni Loot nga kun makatumbok si Benatiro bisan usa ka lugar ug oras nga siya mikuyog sa iyang asawa sa pulong-pulong sa politika sa miaging mga adlaw ug buwan, andam siya moluwat sa katungdanan isip opisyal sa kapolisan.
"If Col. Benatiro can cite a single instance, specific place and time, where I was seen in political pulong-pulong conducted by my wife in the past days or months, even without witness, I will resign as police officer," nagkanayun si Loot.
Matud pa ni Loot nga kun dili kini mahimo ni Benatiro, wa kini'y moral nga katungod sa paghangyo sa katawhan sa lungsod sa Daanbantayan nga siya pabotohan sa umaabot eleksiyon sanglit usa siya ka bakakon.
Si Benatiro sa sayo pa namahayag nga iyang gihangyo si Loot nga dili lang paapil-apilon sa politika apan wala kini naminaw kaniya.
Si Loot sa iyang bahin miingon nga kinahanglang ipamatuod gihapon ni Benatiro ang maong pamahayag.
Giklaro ni Loot nga gawas nga dili tinuod ang tanang pasangil ni Benatiro, wala pa'y gihimong pulong-pulong ang iyang pamilya labot sa politika.