10 senador suporta sa 'Naga City'

Napulo ka senador lakip na niini si Senador Alfredo Lim, tsirman sa Senate Committee on Local Government misuporta sa balaodnon kabahin sa pagka-dakbayan sa lungsod sa Naga nga gipangamahan ni Kongresista Eduardo Gullas atol sa 11th Congress.

Atol sa gipahigayong duha ka espesyal nga sesyon sa Kongreso sayo niining semanaha, ang maong balaodnon napahikling una dihang ang mga kongresista na- busy sa pagtuki sa impeachment ni kanhi Presidente Joseph Estrada.

Si Mayor Valdemar Chiong sa Naga nagkanayon nga positibong mapasar gyud ang proposal ubos sa ayuda ni Gullas ug naglaum nga inig balik sa Congress karong Hunyo kwatro wala nay bisan usa nga senador ang mobabag sa nahisgutang sugyot.

Gibutyag ni Chiong nga si Gullas misaad kaniya nga ini'g balik sa 13th Congress sa Hunyo matuki na ang balaodnon ug maaprobahan kini sa ikaduha ug ikatulong pagbasa ug human niini siguroon sa magbabalaod nga mapadali ang approval sa Malacañang aron mahimo kining balaod.

Si Chiong nabalaka nga basin dili mapasar ang proposal tungod sa bag-ong regulasyon diin gipatas-an ngadto sa P100 milyones ang tinuig nga abot walay labot sa Internal Revenue Allotment (IRA) nga maoy usa ka rekisitos karon nga mahimong dakbayan ang usa ka lungsod.

Ang Naga aduna lang kini P50 milyones nga abot matag tuig walay labot ang IRA.