Mokontra sa mga Martinez tapukon ni Gwen sa 4th dis

Tapukon ni Gob.Gwendolyn Garcia karong Domingo ang iyang mga lider sa ikaupat nga distrito nga balwarte sa mga Martinez nga iyang kaatbang sa politika.

Mahinungdanon sa maong tigum ang presensiya ni kanhi Bokal Benhur Salimbangon.

Kini nunot sa hugon-hugon nga maoy kandidato ni Garcia ubos sa One Cebu Party sa pagka-kongresista sa ikaupat nga distrito atbang kang bisan kinsang kandidato sa mga Martinez.

Dili na makapasubli pa si Kong. Clavel Asas-Martinez sa laing termino sa eleksiyon karong Mayo hinungdan nga ang anak nga si Bogo Mayor Celestino "Tining" Martinez III ang modagan sa pagka-kongresista.

Sama sa iyang inahan, naa na usab sa katapusang termino si Tining isip mayor sa lungsod sa Bogo.

Sayo niini, ang amahan nga si kanhi Kongresista Celestino "Junie" Martinez, miingon nga imposible nga modagan si Salimbangon sa pagka-kongresista sanglit dili sila gusto nga maguba ang relasyon sa ilang pamilya.

Apan kasaligang tinubdan sa kampo ni Martinez nibutyag sa Banat News nga kun modayun si Salimbangon, si Junie ang modagan sa pagka-kongresista.

Si Salimbangon ang gikaatbang ni Clavel sa eleksiyon niadtong 1998 apan napilde kini sa pagka-kongresista sanglit solido sa mga Martinez ang distrito.

Sa pagkakaron, daghang lider si Martinez nga anaa na sa grupo ni Garcia sama nilang Bokal Joven Mondigo kinsa modagan sa pagka-mayor sa Medellin, Daanbantayan Mayor Maria Luisa Loot, Bantayan Mayor Geralyn Escario Cañares, Madridejos Mayor Letecia Mancio, Bise Mayor Pablo Olivar sa San Remegio, konsehal Tessie Lechido sa Tabogon ug uban pang opisyal sa lungsod ug sa kabarangayan.