Lapu chamber wa i-haras: presidente

Gipanghimakak sa Lapu-Lapu Chamber of Commerce and Industry nga gilisudlisod sila ni Mayor Arturo Radaza sa ilang mga negosyo sa maong dakbayan.

Si Alfonso Co, OIC President sa LCCI sa pakighinabi sa Banat News miingon nga sukad nga mitukod sila sa ilang organisasyon sa milabay'ng mga katuigan wala pa gyud sila makasugat og reklamo nga naglambigit sa ilang pagproseso sa mga papeles sa city hall sa dakbayan sa Lapu-Lapu.

Wala usab sila makadungog nga dunay ilang mga kaubanang negosyante nga mireklamo sa ilang buhatan gumikan sa paglisud-lisod ni Radaza kanila sa ilang mga negosyo.

Gumikan niini, matud pa ni Co walay igong basehanan ang pagpadayag ni Mayor Tomas Osmeña nga dunay mga negosyante sa dakbayan sa Lapu-Lapu ang gipangharas ni Radaza sa ilang mga rekisitos sa pagtukod og negosyo sa dakbayan sa Lapu-Lapu.

Matud pa ni Junard "Ahong" Chan, tigpamaba sa kagamhanan sa dakbayan sa Lapu-Lapu nga ang tanang mga alegasyon ngadto kang Radaza kalabot sa pagpangharas sa mga negosyante mugna lang sa bag-ong natukod nga Chamber of Commerce and Industry.

Nasuta nga ang pipila adunay mga kalapasan sa ilang katukoran sa maong edipisyo diin pipila ka adlaw gikan karon sila mohimo og lakang sa pagpa-demolis kanila sama sa ilang gihimo sa Crown Regency Mactan nga iya sa magsuong King.