Mga posters sa mga senatoriables ilimpyo

Mga poster sa mga kandidato alang sa Senado nga wala ipahimutang sa gideklarar nga common poster area sa Commission on Election (Comelec) ipatangtang sa kagamhanan sa dakbayan sa Mandaue.

Nunot niining maong lakang nga ilang himuon gimandoan ni Mayor Thadeo Ouano ang city legal office sa dakbayan sa pagsusi subay sa kadalanan sa dakbayan ug pagtangtang kun may mga poster nga gipataka og papilit.

Si City Legal Officer, Erwin Rommel Heyrosa nga nakadawat sa maong kamanduan mihulma og team aron mag-monitor sa mga lugar sa Mandaue.

Matud pa niya nga ang Akta Republika 9006 nagmando nga ang mga "political parties and party-list to erect common poster areas for their candidates in not more than ten public places such as plazas, markets, barangay centers and the like, wherein candidates can post, display or exhibit election propaganda provided, that the size of the poster areas shall not exceed twelve by sixteen feet or its equivalent."

Gumikan niini si Heyrosa miingon nga tataw kaayo nga ilegal ang mga poster nga gipahimutang sa mga poste sa Visayan Electric Company, mga kilid sa koral sa daplin sa kadalanan nga nakahatag na hinuon og kahugaw sa palibot sa dakbayan.