Si Day-as barangay captain Michael Ocleasa miduso sa gi-aprobahang resolusyon sa barangay nga nagrekomendar ngadto sa konseho aron ipataktak o ba kaha ipasuspenso ang usa sa ilang barangay konsehal nga si Suzeth Quijano.
Ang maong resolusyon pirmado sa kapitan ug sa unom ka mga barangay konsehal niini nga sila si Anthony Daanton, Fredie Esmas, Mardonio Olores, Antonio Cabrillas, Benigno Canega ug Polio Lada.
Nabutang sa maong naaprobahang resolusyon sa barangay nga ilang giduso sa konseho alang sa tukmang lakang mao ang pagsigi og palta ni Quijano sa ilang regular nga sesyon sa barangay.
Matud ni Ocleasa dihang nahinabi sa Banat News sa telepono nga napupos na ang duha ka bulan nga gisang-at nga bakasyon ni Quijano niadto pang katapusang bahin sa bulan sa Oktobre sa milabay'ng tuig.
Apan kanunay gihapon kining absent ug wala nay tambong tambong sa sesyon gikan sa pagkabulan sa Nobiyembre hangtod na sa Enero ning tuiga ug sa katapusan pa lang sa Enero kini mibalik og pakita sa barangay.
Matud ni Ocleasa wala usab motukma ang mga katarungan ni Quijano diha sa iyang gisang-at nga bakasyon nga matud niya mitabang siya sa iyang bana pag-process didto sa Manila sa mga papeles niini alang sa pag-abroad tungod kay duna may nakakita kaniya nga ania lang dinhi sa Sugbu.
Gipasabot ni Ocleasa nga gusto lang nila nga mopakanaog og rekomendasyon ang konseho kun unsay posibleng silot nga ipahamtang ngadto kang Quijano gumikan sa iyang mga kalapasan nga nahimo sa kanunay nga pag-absent sa ilang regular nga sesyon.
Nasayran nga ang konsehal sa barangay mipadala usab og susamang rekomendasyon ngadto sa konseho alang sa pagpataktak sa ilang SK-chairman sa barangay nga si Rafonzel Quijano, anak ni Suzeth gumikan kay wala na usab kini tunga-tunga sa sesyon sukad pa sa milabay'ng tuig gumikan kay atua na kini sa Manila nag-asikaso sa iyang career pagka-singer.