Reklamo sa mananagat iadto ni Glo

Mga reklamo sa mga mananagat sa Talisay kabahin sa mga gihimong development ug pagkoral sa mga magpatigayon diha sa mga baybayon sa siyudad ipaabot ni Bise Mayor Aberdovey Belleza ngadto ni Presidente Gloria Macapagal Arroyo.

Si Belleza nagkanayon sa pakighinabi niini sa Banat News kagahapon nga ang gihunahuna sa maong mga magpatigayon ang ila lang kaugalingong kaayohan.

Niining bag-o lang si Belleza mibahad nga moduso og kaso batok ni Konsehal Procopio " Coping" Fernandez tungod sa pagpatukod niini og restaurant diha sa Tangke diin giingon nga lakip ang baybayon gipakoral sa konsehal nga nakahatag og kahasol sa sobra sa 300 ka mananagat diha sa lugar tungod kay wala na silay ka paradahan sa ilang mga sakayan.

Apan si Fernandez sa iyang bahin nagkanayon ngadto ni Mayor Socrates Fernandez nga wala kini gahum nga makapahunong sa iyang pagpa-develop tungod kay wala kini lakip sa hurisdiksiyon sa Department of Environment and Natural Resources (DENR) ug Public Reclamation Authority.

Karong adlawa, si Belleza moduso og sugyot sa konseho sa siyudad nga nag-awhag ni Arroyo sa pagdeklarar nga ang mga kabaybayonan sa Talisay dili angayang ilakip sa mga buhatong development project diin ang maong mga lugar kinahanglang ipreserba.