10% sa honorarium maisip nga 'loan' — Ouano

Ang pag-iban og 10 porsiyento sa matag bulan nga honorarium nga gitanyag sa pipila ka sakop sa konseho sa dakbayan sa Mandaue maisip nga "unauthorized loan" sanglit gi-disallow man sa Commission on Audit ang pagpasobra sa gidawat nila sa matag bulan.

Kini ang gipadayag sa press statement nga gipadangat ni Mayor Thadeo Ouano sa Banat News kagahapon isip reaksiyon sa pag-abstain nila ni Konsehal Glenn Bercede, Konsehal Jonas Cortes ug Konsehal Elmer Cabahug sa tinguha nga pag-utang og salapi alang sa pagtiwas sa kaugmaran sa merkado publiko.

Gipasabot sa mayor nga naghinapos na ang ilang termino isip sakop sa konseho sa dakbayan ug makatarunganon lamang ang lakang sa COA sanglit maglisod na man unya ang dakbayan sa pagbalik sa sobrang salapi nga nakobra sa ilang honorarium.

Matud pa sa pamahayag sa mayor nga nadawat sa Banat News nga ang pipila ka sakop sa konseho sa dakbayan dili gani angayan sa pagdawat sa ilang honorarium sanglit wala man kini makahatag og maayong serbisyo sa ilang katungdanan.

Base sa natala sa matag regular session makita nga ang pipila ka mga konsehal napakyas sa pagpalabang og balaodnon nga magsuporta sa ekonomikanhong kalambuan sa dakbayan.

Si Ouano miisip sa pito ka mga sakop sa konseho nga bag-ong bayani tungod sa ilang pagtahan sa tibuok bulan nilang honorarium alang sa pagtuman sa kamanduan sa COA.

Naglakip kanila mao sila si Konsehal Carlo Fortuna, Wenceslao Gakit, Procopio Villanueva, Raul Cabahug, Allan Borbajo, Dionesio Ceniza ug Sangguniang Kabataan Federation President Kristabel Cuizon.