Motor vs Ceres; 1 patay

Patay ang usa ka backrider nga lalaki ug nagrabehan usab ang drayber human ang ilang giluwanang motorsiklo mibangga sa Ceres Bus pasado alas 8 sa miaging gabii sa may kurbadahon bahin sa Lugo, Borbon.

Ang namatay dihadiha mao si Mira Mante Pablete Jr. nga taga dakbayan sa Lapu-Lapu samtang nagrabehan ang drayber sa motorsiklo nga si Maximo Branzuela, 26, residente sa San Jose, Borbon ug kasamtangan nagpuyo sa panimalay sa ginikanan ni Pablete diha sa Lapu-Lapu.

Base sa imbestigasyon ni SPO2 Maximo Sanico sa nahitaboan ang duha ka biktima gikan sa Lapu-Lapu paingong San Jose.

Apan paghidangat sa nahisgutang dapit ang Aura nga motorsiklo YO- 7780 nga gimaneho ni Branzuela kalit lang miuntol ang ligid tungod sa culvert hinungdan nga misimang sila sa pikas dalan apan diha ang Ceres Bus GWK- 175 gikan sa Bogo paingon sa Cebu City nga gimaneho ni Joel Alarde, 42, minyo nga taga Taytayan Hills, Bogo, Cebu ug maayong pagkaigo sa atubangan bahin sa motorsiklo.

Si Branzuela ug Pablete nabuwag ug nangalagpot gikan sa motorsiklo ug napunta sa aspaltadong dalan.

Si Pablete maoy namatay dihadiha human napantok ang ulo sa dalan samtang si Branzuela nagrabehan usab human makahiagom og samad, pangos sa kalawasan ug bali sa bitiis.

Daling gihatod sa tambalanan sa dakbayan sa Sugbu si Branzuela ug padayon pa kining giatiman sa mga doktor.

Ang drayber sa Ceres Bus nga si Alarde gitanggong na karon sa detention cell sa Borbon.

Si SPO1 Morie Magdadaro nga nahinabi sa Banat News niingon nga mihulpa ang karsada sa nahitaboan tungod sa culvert sa maong dapit.

Matud niya nga labihang gubaa sa motorsiklo ni Branzuela gani nabali ug natangtang ang manobela niini sa kakusog sa impak sa pagkabangga ngadto sa dulong sa Ceres Bus.