Corro mihimakak sa pasangil batok ni Mayor Radaza

Gipanghimakak ni Engr. Augusto "Dodong Itok" Corro, kandidato pagka mayor sa lungsod sa Daan Bantayan nga dunay P25 milyones nga gigahin sa iyang bayaw nga si Lapu-Lapu City Mayor Arturo Radaza alang sa iyang kandidatora sa umaabot nga eleksiyon karong Mayo.

Kini ang giluwatang pamahayag ni Corro atol sa usa ka press conference kagahapon sa udto.

Matud pa ni Corro nga nalooy siya sa iyang bayaw nga si Radaza kinsa napuno na sa mga atake ug nadugang pa gyud ang maong isyu.

Gibutyag ni Corro nga aduna siyay igong salapi nga ikasakbang batok kang Sun Shimura ang anak ni incumbent Mayor Maria. Luisa Loot sa Daan Bantayan nga magpapiling mayor sa maong lungsod hulip sa iyang inahan nga karon nalang ang katapusang termino.

Si Corro nagkanayon nga dako siya'g nakuha nga retirement benefit sa iyang pagserbisyo sa Phil. National Oil Company kun PNOC kinsa usa siya ka kanhi operations manager sa maong kompaniya ug miretiro niadtong tuig 2003.

Apan si Corro gibati og kabalaka nga dunay mahitabong tikas sa umaabot nga piniliay sama sa nahitabo sa milabay'ng eleksiyon nga napalong ang suga ug mitumaw nga si Loot ang midaug.

Kagahapon atol sa press conference gipaila ni Corro ang iyang mga kauban sa partido diin suportado kini ni kanhi kongresista Junie Martinez.

Ang modagan pagka bise mayor mao si Dr. Jose "Jun" de Leon Jr. pagkakonsehal mao sila ni Ret. Col. Hiram Benatiro, Atty. Gilbert Arrabis Jr., Atty. Braulio Arriola Jr, Engr. Renerio"Dodong" Arrogante III, SB Reul Corro, incumbent Vice Mayor Mariano "Nieve" Diaz, Chona "Bata" de Leon ug ex SB Jovencio "Joven" Taneo diin nagdala sa grupo nga "Kusog Kandayan-on".