Fratman namusil sa batan-on sa Guadalupe gipabuhian

Gipasanginlang fratman nga apil sa namusil sa usa ka batan-on diha sa Guadalajara sa Guadalupe niadtong milabay'ng Pebrero 16 gipabuhian sa piskalya tungod sa kakulang sa ebidensya.

Si Floredo Saban, alyas Kabang, 22, taga sitio Guadaville, Guadalupe gimandong pabuhian ni Assistant Prosecutor Mary Ann Castro sa City Prosecutor's Office may labot sa pagkapusil kang Christopher Tinapay,18, nga taga sitio Tugasan, Guadalupe.

Si Saban nadakpan sa grupo nila ni SPO3 Alex Dacua sa Homicide Section atol sa hot pursuit operation human sa hitabo ug gidala atubangan sa biktima sulod sa usa ka tambalan diin kini giingong positibong giila sa biktima.

Apan diha sa piskalya sa pagpasaka na og kaso batok kaniya wala makakita si Castro og igong rason nga dunay kalambigitan si Saban sa pagkapusil kang Tinapay.

Wala usab kakitai og ebidensya nga magtumbok nga nakigkunsabo si Saban sa mga suspek nga mipusil sa biktima niadtong tungura. Matud pa sa kapolisan usa ka 17 anyos nga miyembro og usa ka fraternity, giila lang sa ngalan nga Chao ug ubang wala mailhing mga batan-on ang gitumbok nga mipusil sa biktima.

Ang hepe sa Homicide Section nga si Inspector Mario Monilar mitug-an sa Banat News nga mahimo pa gihapong masang-at ang kaso batok kang Saban kung dunay bag-ong mga testigos ug ebidensyang magtumbok kaniya.

Dugang pa sa opisyal nga igo lang silang mosang-at sa kaso base sa pasiunang mga ebidensya nga ilang nakaylap aron kahatagan og hustisya ang nabiktima.