Ang biktima kinsa nakaangkon og pinusilan sa iyang dughan agi sa wala pa matinong kalibre sa armas giila sa kapolisan mao si Rutchel Vollosos, 17, ug nagpuyo sa maong dapit.
Si Vollosos daling gihatod sa District Hospital sa Minglanilla apan patay nang nadangat sa maong tambalanan.
Samtang ang gitumbok nga suspek mao ang usa ka batan-on human dihay nakakita nga midagan dapit sa nahitaboan.
Si SPO1 Ricky Larrobis sa Minglanilla Police nga nahinabi sa Banat News nagkanayon ang biktima uban sa walo nga iyang barkada gikan nitambong og disko.
Samtang sila nanglakaw padung mamauli sa ilang tagsa-tagsa ka pinuy-anan pag-abot sa unahan mga 300 metros ang gilay-on sa Sports Complex kalit lang gipusil ang biktima.
Matud ni Larrobis pagkatumba sa biktima may nakakita sa usa ka batan-on nga inanay naglakaw sa dapit nahitaboan ug pag-abot sa unahan mikaratil og dagan.
Ang kapolisan dako ang pagtuo nga dunay kalambigitan sa fraternity ang pagpamusil apan ila pa kining susihon pag-ayo.
Matud ni Larrobis nga basin naalaan lang ang biktima o ba kaha gipareglahan lang kini.
Dugang sa kapolisan ang biktima usa ka band member sa ilang eskuylahan diha sa Minglanilla.