Magsuon giluba, 1 patay

Magsuon gipangdunggab og pinote, usa ang patay ug usa ang naa sa kritikal nga kahimtang diha sa Sitio Bantayan sa Hari, Looc dakbayan sa Mandaue kagahapon sa kaadlawon.

Ang mga biktima mao sila Manuel Romares, 27, minyo ug Jaymar Romares, 24, minyo, mga lumad sa maong dapit.

Base sa imbestigasyon ni PO2 Vicente Gela Jr. sa station 5 sa kapolisan sa MCPO nasayran nga usa ka Agapito Gracia, 55, minyo ug silingan sa biktima ang responsable sa pagdunggab sa mga biktima gamit ang usa ka pinote.

Matud pa ni Manuel Romares samtang nag-inom sila sa iyang igsuon kalit lang miabot si Gracia ug sa way igong hinungdan kalit kini nga midunggab ni Manuel tumong sa iyang walang bahin ubos sa iyang gusok.

Sa dihang si Manuel misaka sa ilang panimalay aron mangayo og tabang si Jaymar usab miuwang ni Gracia, apan siya na usab ang giatubang ug dayong dunggab ngadto kang Jaymar tumong kini sa iyang dughan.

Ang duha ka managsoon gidala sa Mandaue City Hospital apan si Jaymar gideklarar nga DOA samtang si Manuel gibalhin sa VSMMC ug anaa kini sa kritikal nga kahimtang.

Sa gihimong hot pursuit operation sa kapolisan sa station 5 pakyas kini sa pagsikop ni Gracia human kini mosibat pagkahuman sa maong insidente.

Hinuon matud pa ni PO2 Gela dugang pang imbestigasyon ang iyang himuon aron mahibaw-an ang motibo sa pagdunggab sa duha ka magsoon.