Tomas di mobubo suporta ni John-John

Gi-klaro ni Mayor Tomas Osmeña nga wala siyay plano nga suportahan ang kandidatura sa iyang pag-umangkon nga si kanhi Bise Gobernador John Gregory "John-John" Osmeña kun mohinayon kini pagpapili atbang kang Kongresista Eduardo Gullas sa unang distrito sa lalawigan sa Sugbo.

Giangkon hinuon sa mayor nga mitawag kaniya ug mipahibalo sa mao niyang laraw si John-John apan wala kini magpasabot nga nangayo og suporta kaniya kabahin sa kandidatura niini.

Si John-John nga anak ni kanhi Senador Sonny Osmeña ang ig-agaw sa mayor apan kontra niya sa politika una nang mibutyag sa plano sa iyang anak nga interesadong magpapili pagka-kongresista atbang kang Gullas.

Giklaro hinuon sa mayor nga dili siya maoy amahan ni John-John ug walay igong basehanan nga ipasa ngadto kaniya ang responsibilidad sa usa ka amahan.

Bugtong gitin-aw sa mayor nga wala siya magsugo kang John-John ingon man kang Konsehal Gabriel Leyson paglansar sa unang distrito sa piniliay karong sa Mayo.

Si Leyson una nang gikataho nga gisugo ni Osmeña nga mo-atbang kang Talisay City mayor Socrates Fernandez nga kaalyado ni Gullas gumikan sa panagsungi karon sa siyudad ug Talisay kabahin sa portion sa South Reclamation Project (SRP) nga nasakop sa hurisdiksyon sa Talisay.

Nasayran nga niadto pang milabay'ng 2004 nga eleksiyon nagtinguha si Sonny nga palansaron pagka-kongresista atbang kang Gullas ang iyang anak apan wala kini motuman ug milansar pagka-gobernador atbang ni Gobernador Gwendolyn Garcia ug napildi.