Teddy O. misalig nga may dagkong kalihukan ang CICC

Mga dinagkong kalihukan ang gitinguhang ipahigayon sa Cebu International Convention Center (CICC) sa reclamation area sa dakbayan sa Mandaue sa mosunod nga mga bulan karong tuiga.

Si Mayor Thadeo Ouano miingon nga naglakip sa maong mga dinagkong kalihukan nga pasiugdahan sa CICC mao ang gikan sa ubang kanasuran nga naglakip sa international exhibit ug uban pa.

Si Ouano miingon nga ilang gitinguha ang pagkuha'g mga professional team nga maoy kasamtang mopadagan niini nga gitumong alang sa paghapsay sa pagdumala CICC.

Gipasabot ni Mayor Ouano nga ang management board nagkinahanglan og mga tawo nga adunay dakong kasinatian alang sa pagpasiugda og international conference ug mga dinagkong kalihukan.

Hinuon si Gobernador Gwendolyn Garcia sa iyang pamahayag naneguro nga ang financial matters ang ubos gayod kanunay sa management board.

Gitataw niya nga mga kaakohan sa professional management team nga ang gidugayon sa paghupot sa katungdanan ang molungtad lamang sa operasyon.

"We will then be given the luxury of time, to observe how things will go at the CICC ," nagkanayon ang gobernador sa Sugbo sa iyang pamahayag. " We will then be able to determine exactly what kind of arrangement we want" dugang niini.

Matud pa niya nga daghang mga pamaagi sa pagdumala sa CICC nga ilang gitun-an nga naglakip niini mao ang joint venture, simple lamang nga lease agreement ug mahimo usab ang hotel type nga pagdumala niini.