Duha milapas sa Gun Ban gidakop

Duha ka tawo nadakpan tungod sa paghupot sa way lisensyang armas dinhi sa Metro Cebu niadtong milabay'ng gabii ug kagahapon sa kaadlawon.

Ang nangadakpan gikatakdang pasakaan og kasong paglapas sa Comelec Gun Ban ug ingon man sa Akta Republika 8294 kun illegal possession of firearms sumala pa sa kapolisan.

Unang nadakpan giila ni P03 Cerilo Lagumbay nga si Ofelio Cañete Aguilon, 43 anyos, minyo nga taga Sudtonggan, Basak dakbayan sa Lapulapu.

Matud pa ni P03 Lagumbay nga nadakpan ang maong suspetsado nila ni SP01 Michael Limalima human makadawat og alarma sa kagubot diha sa maong dapit.

Ang mga residente ra sa maong dapit ang mitug-an nga dunay gidalang armas si Aguilon hinungdan nga ila kining girekisa ug nakit-an ang usa ka kalibre .45 nga pistola.

Samtang usa ka .38 kalibre nga paltik nga may sulod nga mga buhing bala ang nasakmit sa kapolisan sa Basak Police station sa Mandaue sulod sa usa ka PUJ atol sa gihimong checkpoint diha sa dalan J.P. Rizal sa Jagobiao.

Ang nakasakmit sa maong armas mao ang grupo nila ni SP04 Jose Dilao kinsa uban sa mga sakop sa mga anti-crime volunteers ug mga Barangay Inteligence Network (BIN) milusad og checkpoint.

Ang maong PUJ gikan pa sa Danao.

Dihang gipakanaug ang mga lalaki nakit-an nalang ang maong armas nga gipatong sa lingkuranan apan walay bisan usa kanila ang miangkon nga maoy nagdala niini.

Samtang sa dakbayan sa Sugbu, usa ka Rommel Cobus,21, nga taga Cedaville, Nasipit, Talamban ang gidakop human makuhai og usa ka .38 caliber nga Armscor 2015 nga may lima ka buhing bala ug usa ka basiyo.

Gikatahong dunay residente sa Kalubihan, Talamban ang mitug-an kabahin sa presensya sa usa ka lalaking dunay armas hinungdan nga gisusi kini nila ni PO2 Jovanne Placencia ug PO2 Rolando Banatasa.