Cityhood sa Talisay lisud na bawion

Kagamhanan sa dakbayan sa Sugbo dili magmalampuson sa pagpabalik sa dakbayan sa Talisay ngadto sa pagka-munisipalidad.

Si City Legal Officer Paterno Belciña Jr. mibutyag nga ang dakbayan sa Sugbo maglisud na sa pagpabalik sa Talisay ngadto sa pagkamunisipalidad.

"Kun imong huna-hunaon legally para nako is difficult to assail sa cityhood sa Talisay, ang analogy mora gud na og toothpaste ba nga imong gigamit unya imong ipasud og balik, I don't think nga mo-reverse ang decision sa Supreme Court duna na may decision sa Court of Appeal," si Belciña nagkanayon.

Gibutyag ni Belciña nga sa milabay'ng tuig gibasura na sa CA ang gidusong reklamo sa Sugbo batok sa Talisay ug gibasura usab ang motion for reconsideration nga ilang giduso hinungdan nga ila kining gipaabot ngadto sa Korte Suprema.

Si Belciña milingkod isip legal consultant niadtong Disyembre kwatro sa milabay'ng tuig dihang si kanhi Talisay city legal officer Aurora Econg wala pa moluwat sa iyang katungdanan.

Apan niining bag-o lang ang konseho sa dakbayan mipasar og resolusyon sa pag-concur ni Belciña isip city legal officer hulip kang Econg.

Matud ni Belciña nga ang dakbayan adunay pito ka bug-at nga kasong giatubang diin usa na niini mao ang nahisgutang reklamo sa Sugbo.

Ang city legal officer midungag nga ipadayon niya ang nasugdan nang trabaho ni Econg kabahin sa legal nga mga buhaton.