Pichay, Oreta lahi-lahi'g baruganan sa Sugbuak

Managlahi ang baruganan sa duha ka mga kandidato sa pagka-senador nga sila si Rep.Prospero Pichay ug kanhi Senador Tessie Oreta kabahin sa isyu sa Sugbuak dinhi sa Sugbu.

Si Pichay sa panagtigum sa mga sakop sa media niadtong milabayng Biyernes sa buntag dayag kaayong mitug-an nga iyang babagan ang tinguha sa pipila ka mga kongresista sa lalawigan sa Sugbu nga buot mobahin-bahin sa Sugbu.

Matud pang Pichay nga dili niya suportahan ang maong lakang ug kung dunay covenant nga gikinahanglang lagdaan sa mga kandidato pagkasenador karon kabahin niini molagda siya nga supak sa maong tinguhang buakon ang Sugbu.

Alang kaniya mas naila ang Sugbu sa pagka-Sugbu niini ug nilambo kini tungod sa kalig-on niini dugang pa niini nga dunay mga langyaw nga mas nakaila pa sa pangalan nga Cebu kaysa Pilipinas.

Kahinumdoman nga dunay mga migawas nga mga report kabahin sa baruganan ni Cebu governor Gwendolyn Garcia nga dili suportahan sa One Cebu Party ang mga kandidato sa pagka-senador nga dili molagda sa covenant nga magsigurong ang Sugbu dili bahin-bahinon ngadto sa upat ka lalawigan.

Samtang si Tessie Oreta sa pakighinabi sa Banat News niadtong milabay'ng gabii nagkanayon nga wala siya makakita og dakong kalainan para makahatag og gibug-aton ang iyang paglagda sa maong covenant.

Matud pa niini nga bugtong kasiguruhan nga dili mabuak ang lalawigan sa Sugbu kung ang mismong mga taga Cebu ang mobabag niini ug dili ang mga politiko.

"Ang sagot ko diyan ay, this things could be answered by you, as Cebuanos, personally, ako matibay ang paniniwalang kong matibay kayong mga Cebuano, kaya nga kayo laging sikat eh…I don't think my opinion should matter," asoy pang Oreta.

Si Oreta ug Pichay parehong nasakop sa Unity Team sa administrasyon. Si Pichay daan ng sakop sa Lakas Christian-Muslim Democrats party samtang si Oreta kanhi sakop sa oposisyon sa napalagpot nga si Joseph Ejercito Estrada.

Si Oreta maoy gibansagang "Dancing Queen" sa Senado dihang siya misayaw sa kalipay dihang napugngan sa mga senador ang pag-abli sa kontrobersyal kaayong ikaduhang envelop nga giingong nagbaton sa mga bug-at nga ebidensya batok ni Estrada may labot sa pasangil nga pagpangawkaw ug kurapsyon pipila na ka tuig ang milabay.

Mibiya si Oreta sa oposisyon uban ni kanhi senador Vicente Sotto human silang duha wala iapil sa partido UNO sa oposisyon ug anhi midapig sa administrasyon.

Hinuon si Oreta nangayo na og pasaylo kabahin sa iyang gihimo tungod sa iyang pagsayaw sa Senado ngadto sa mga Sugbuanon ug nagkanayon nga angayan na kadtong kalimtan.