Ang nalandig sa tambalanan gumikan sa igo sa bala diha sa iyang dughan giilang si Christopher Tinapay,18, taga Tugasan sa samang barangay kinsa gipusil sa usa ka 17 anyos nga miyembro sa karibal nga fraternity.
Samtang ang nadakpan nga giingong kauban sa mipusil kang Tinapay giilang si Florido Saban ,22, alyas Kabang, taga sitio Guadaville sa maong barangay nga matud pang PO2 Henry Orbiso sa Banat News miangkong inactive nga miyembro sa usa ka fraternity.
Dugang gipangita mao ang mga kaubanan ni Saban nga mao ang 17 anyos nga gunman, usa ka giila lang nga si Timoy alyas Chao ug uban pang mga giingong sakop sa grupo apan nakaikyas.
Sumala pang Orbiso base sa alegasyon ni Saban, padulong kini sa usa ka internet café sa maong dapit dihang kalit nga gipareglahan sa grupo sa biktima maong midagan siya ug nagpalaban sa iyang mga higala.
Apan dihang nag-abot ang duha ka pundok nahitabo ang karambola tali kanila ug ang 17 anyos nga suspek mibunot og armas dayong pusil sa biktima makadaghang higayon diin naigo kaduha ang walang bahin sa dughan niini ug usa diha sa tuong bahin sa lawas.
Ang mga suspek daling nagtibulaag og dagan pag-ikyas sa dapit apan si Saban naabtan sa mirespondeng sila si SPO3 Alex Dacua uban nila ni Orbiso.
Si Tinapay daling gidala sa Chong Hua Hospital sa iyang mga kabanay ug higala samtang si Saban kasamtangan karong gitanggong sa kapolisan alang sa pagpasaka og kaso.