Suspek sa rape naghikog patay

Usa ka retirado ug sundalo kinsa nag-atubang og kasong pagpanglugos ug nabalhog sa prisohan sa miaging semana naghikog ug namatay pinaagi sa paghigot og habol sa liog sulod sa detention cell sa San Fernando Police Station.

Nadiskubrehan sa kaubang priso nga wala nay kinabuhi kagahapon sa buntag si Almario De Guzman, minyo, ug residente sa San Isidro sa maong lungsod.

Segun sa report sa kapolisan si De Guzman gi-turn-over sa police station ni San Isidro barangay Kapitan Rodrigo Sebial sa miaging semana duha ka adlaw human nahitabo ang pagpanglugos ngadto sa iyang silingan.

Usa ka Alejandro Cañas, kaubang priso ni de Guzman nibutyag nga iyang nabantayan ang biktima pasado alas 2 kagahapon sa kaadlawon nga gitugnawan.

Iyang namatikdan nga naglingkod kini kilid sa semento ug daw sa wala na maglihok tungod sa katugnaw sa panahon.

Apan pagka alas 6 sa pagmata ni Cañas maoy una niyang nakit-an nga nagbitay na kini ug patay na.

"Wala mi namatikdan niya sa miaging mga adlaw kay semana paman kapin napriso lahi siya sa ubang piniriso diri kay dili mangomedya dili magtingog-tingog, hilum kanunay nagbilin man siya og suicide note matud ni SPO1 Joel Nebroja sa dihang nahinabi sa Banat News kagahapon.

Ang patay'ng lawas ni De Guzman gipaubos sa autopsiya aron matino kung dunay foul play ang kamatayon niini.