Guardo di suportahan ni Pichay

Ang kandidato pagka-senador nga si Kongresista Prospero "Butch" Pichay mipadayag atubangan sa media kagahapon nga iyang suportahan ang kandidatura sa South District nga si Rep.Antonio Cuenco bisan paman nga ang kaatbang niini mao si Jonathan "Atan" Guardo nga iyang pag-umangkon.

Si Pichay dihang gipangutana sa usa sa mga sakop sa media kagahapon kabahin kung kinsay iyang suportahan tali nila ni Guardo ug Cuenco nagkanayon nga sundon niya ang patakaran sa iyang partido nga Lakas Christian-Muslim Democrats.

"I have been issuing statement, as I said I cannot choose my relative but even if he is my brother, bisan og ako nang igsoon I will support Tony Cuenco because I am a party man and I will always abide by the party rules, kun gikinahanglang motungtong ko sa entablado I would do that," asoy pa ni Pichay.

Si Guardo sa pakighinabi sa Banat News nagkanayon nga expected na niya nga mao gyud ni ang itubag ni Pichay tungod kay gikinahanglan ni Pichay ang suporta sa Bando Osmeña Pundok Kauswagan (BOPK) diin si Cuenco nasakop.

Matud pa niya nga ang BOPK dako og matabang kang Pichay ug nagtuo siyang matabangan gyud siya sa maong partido dinhi sa Sugbu. Dugang pa ni Guardo nga posibleng pang-public consumption lang ang pagpadayag sa iyang uyoan og suporta kang Cuenco sanglit kaniadto pa nagsuportahay na ang ilang pamilya.

Si Pichay kinsa ubos sa partidong "Team Unity" sa administrasyon mibutyag nga usa sa iyang buot nga usbon mao ang panglantaw sa mga Pilipino kabahin sa kaugalingon produkto nga dako og ikatabang sa pagpalambo sa ekonomiya sa nasud.

Dugang pa niini nga mas madali ang kalampusan sa ekonomiya kung madugangan pa ang mga export processing zones sa nasud aron pinaagi niini makat-on ang mga Pilipino sa paghimo og mga de kalidad nga produkto susama sa gihimo sa mga Koreano.